Politika e privatësisë
Përditësuar: e premte, 30 tetor 2026
Kjo faqe shpjegon cilat të dhëna përpunojnë aplikacioni Kohët e Namazit dhe faqja kohetenamazit.com, pse i përpunojnë dhe me kë i ndajnë. Përshkruan vetëm atë që shërbimi bën realisht sot.
1. Kush i përpunon të dhënat
Kontrollues i të dhënave është Indrit Vaka, person fizik, që e ndërton dhe e mban aplikacionin dhe faqen. Në këtë faqe, „ne“ do të thotë ai. Kontakti bëhet vetëm me email, në adresën që gjendet te seksioni Kontakt.
Shërbimi nuk ka llogari përdoruesish. As aplikacioni, as faqja nuk të kërkojnë emër, email, numër telefoni apo fjalëkalim, dhe ne nuk krijojmë profil për ty.
2. Aplikacioni
Vendndodhja
Aplikacioni ka nevojë për vendndodhjen tënde për të llogaritur kohët e namazit dhe drejtimin e Kibles. Mund ta lejosh telefonin të japë vendndodhjen ose mund të zgjedhësh vetë një qytet nga lista. Vendndodhja përdoret vetëm kur aplikacioni është i hapur, kurrë në sfond.
- Kur prek butonin për vendndodhjen, aplikacioni i kërkon telefonit një pozicion të përafërt. Koordinatat (gjerësia dhe gjatësia gjeografike) ruhen në telefon, bashkë me emrin e qytetit.
- Për të gjetur emrin e qytetit, aplikacioni ia dërgon këto koordinata shërbimit Nominatim të OpenStreetMap (nominatim.openstreetmap.org), që e drejton OpenStreetMap Foundation. Ky shërbim e merr kërkesën bashkë me adresën IP të telefonit dhe e trajton sipas politikës së vet të privatësisë.
- Për të marrë oraret, aplikacioni i dërgon serverit tonë koordinatat, muajin dhe vitin. Nëse e ke zgjedhur qytetin vetë, dërgohen koordinatat e qytetit, jo të telefonit. Serveri gjen qytetin më të afërt nga lista jonë dhe llogarit oraret. Koordinatat nuk i ruan. E vetmja gjë që ruan është një numërues ditor për çdo qytet (sa kërkesa erdhën për atë qytet atë ditë), pa koordinata dhe pa asnjë identifikues të pajisjes. Me këtë statistikë shohim në cilat qytete përdoret aplikacioni dhe ku duhen përmirësuar oraret.
- Nëse qyteti më i afërt në listën tonë është më larg se 50 km, serveri ia dërgon koordinatat shërbimit Azure Maps të Microsoft, për të gjetur emrin e vendbanimit atje. Microsoft i merr koordinatat nga serveri ynë, jo nga telefoni yt, prandaj nuk e sheh adresën tënde IP. Vendbanimin që gjendet e shtojmë në listën tonë të qyteteve me koordinata të rrumbullakuara në 0,1° (rreth 11 km), që të mos tregojnë ku ishte telefoni, dhe pa asnjë identifikues të pajisjes; koordinatat e sakta nuk i ruajmë. Microsoft i trajton këto kërkesa sipas deklaratës së vet të privatësisë.
- Busulla e Kibles e llogarit drejtimin në telefon, nga vendndodhja dhe sensori i telefonit, sa kohë që busulla është e hapur.
Lejen për vendndodhjen mund ta heqësh në çdo kohë nga cilësimet e telefonit dhe ta zgjedhësh qytetin me dorë.
Kërkimi i qytetit
Kur kërkon një qytet me emër, teksti që shkruan i dërgohet serverit tonë. Nëse serveri nuk e gjen në listën e vet, ia përcjell tekstin e kërkimit shërbimit Azure Maps të Microsoft, për ta gjetur vendin. Microsoft e merr tekstin nga serveri ynë, jo nga telefoni yt, prandaj nuk e sheh adresën tënde IP. Nëse vendi gjendet, e shtojmë në listën tonë të qyteteve, që kërkimi i radhës të mos ketë nevojë për Microsoft; nuk ruajmë se kush e kërkoi. Microsoft i trajton këto kërkesa sipas deklaratës së vet të privatësisë.
Njoftimet
Alarmet e namazit dhe kujtesat programohen në vetë telefonin (njoftime lokale). Për to nuk i dërgohet asgjë serverit tonë. Aplikacioni nuk përdor njoftime push nga serveri: nuk regjistron asnjë token njoftimesh dhe ne nuk ruajmë asnjë të tillë.
Reklamat
Aplikacioni është falas dhe mbahet me reklama nga Google AdMob: reklama brenda ekraneve (native dhe banerë), herë pas here një reklamë në ekran të plotë kur hap një sure, dhe reklama me shpërblim që zgjedh vetë t'i shikosh kur ndryshon temën ose pamjen e ekranit kryesor. Google e përpunon ID-në e reklamave të pajisjes, adresën IP dhe të dhëna teknike për telefonin sipas politikave të veta, për t'i shfaqur dhe matur reklamat dhe për të parandaluar mashtrimin, dhe mund t'i personalizojë reklamat. Ne nuk e marrim ID-në e reklamave dhe nuk shohim të dhëna për ty; marrim vetëm statistika të përmbledhura për reklamat. Në cilësimet e AdMob kemi bllokuar kategoritë e ndjeshme të reklamave.
ID-në e reklamave mund ta rivendosësh ose ta fshish, dhe personalizimin e reklamave mund ta kufizosh, nga cilësimet e Android (zakonisht te Privatësia, pastaj Reklamat; emri ndryshon sipas telefonit). Si i përdor Google të dhënat në aplikacionet dhe faqet që përdorin shërbimet e tij shpjegohet në faqen e Google për këtë temë.
Recitimet e Kuranit
Kur dëgjon një recitim, aplikacioni i merr listën e recituesve dhe skedarët audio direkt nga shërbimi publik Quran.com (api.quran.com dhe verses.quran.com). Si çdo server, Quran.com e sheh adresën IP të telefonit dhe cilin skedar kërkon. Recitimet që ke dëgjuar ruhen në telefon, që të mos shkarkohen sërish.
Të dhënat në telefon
Në telefon ruhen: cilësimet (qyteti, me koordinatat dhe shtetin e tij, gjuha, metoda e llogaritjes, alarmet, tema, recituesi dhe gjinia, nëse e zgjedh te udhëzuesi i namazit), oraret e shkarkuara për muajin, ajetet që shënon në Kuran, teksti i Kuranit dhe lutjet, si dhe recitimet e ruajtura. Përveç koordinatave për oraret dhe shtetit për eventet, asgjë nga këto nuk na dërgohet. Kur fshin të dhënat e aplikacionit ose e çinstalon, ato fshihen nga telefoni. Megjithatë, Android mund t'i ruajë këto të dhëna (si cilësimet, koordinatat dhe ajetet e shënuara) si kopje rezervë në llogarinë tënde Google (Android Auto Backup) dhe t'i rikthejë kur e instalon sërish aplikacionin; këtë e kontrollon te cilësimet e kopjeve rezervë të Android.
Aplikacioni shkarkon nga serveri ynë edhe festat dhe eventet, si dhe përditësimet e tekstit të Kuranit. Kërkesa për eventet përmban kodin e shtetit të qytetit tënd (p.sh. AL); kërkesat për përditësimet e Kuranit nuk përmbajnë të dhëna për ty.
Si çdo server në internet, serveri ynë e sheh adresën IP të telefonit kur merr një kërkesë. Nuk e ruajmë në bazën e të dhënave dhe nuk e lidhim me vendndodhjen. Serveri mban log-e teknike për gabimet, të cilat mund të përmbajnë, për shembull, tekstin e një kërkimi qyteti që dështoi; i përdorim vetëm për të rregulluar problemet.
Kërkesat e aplikacionit drejt serverit tonë kalojnë përmes Cloudflare, Inc., që qëndron përpara serverit tonë (proxy) dhe e mbron nga sulmet. Prandaj Cloudflare e sheh adresën IP të telefonit dhe kërkesën e plotë, përfshirë koordinatat dhe tekstin e kërkimit të qytetit, dhe mban log-e lidhjeje sipas politikës së vet të privatësisë.
3. Faqja kohetenamazit.com
- Cloudflare. Faqja shërbehet përmes Cloudflare, Inc., që qëndron mes shfletuesit tënd dhe serverit tonë (proxy), e mbron faqen nga sulmet dhe e shpërndan më shpejt. Për këtë, Cloudflare përpunon adresën IP, të dhëna për shfletuesin dhe adresën e faqes që hap, dhe mban log-e lidhjeje sipas politikës së vet të privatësisë.
- Statistika pa cookie. Për të ditur sa vizita ka faqja dhe cilat faqe lexohen, përdorim Cloudflare Web Analytics. Ai nuk vendos cookie dhe nuk mbledh të dhëna personale; ne shohim vetëm numra të përmbledhur.
- Reklama. Faqja nuk ka reklama.
- Pa llogari, pa formularë. Faqja nuk ka llogari, regjistrim apo formularë, dhe ne vetë nuk vendosim cookie. Faqja nuk të kërkon vendndodhjen.
Nëse na shkruan me email, marrim adresën tënde dhe atë që shkruan, dhe i përdorim vetëm për t'iu përgjigjur mesazhit tënd.
4. Baza ligjore dhe ruajtja
Bazat ligjore sipas nenit 6 të GDPR:
- Oraret, eventet, kërkimi i qytetit, gjetja e emrit të qytetit nga koordinatat përmes Nominatim, gjetja e vendbanimit përmes Azure Maps kur je më larg se 50 km nga çdo qytet, recitimet dhe përgjigjet me email: për të ofruar shërbimin që kërkon vetë (neni 6(1)(b)).
- Numëruesi ditor për qytet, log-et teknike, Cloudflare dhe statistikat pa cookie: interesi ynë i ligjshëm për ta mbajtur shërbimin të saktë, të sigurt dhe të shpejtë (neni 6(1)(f)).
- Reklamat në aplikacion i shfaq Google AdMob. Google e përpunon ID-në e reklamave sipas politikave të veta dhe mund t'i personalizojë reklamat; ID-në e reklamave mund ta rivendosësh ose ta fshish, dhe personalizimin mund ta kufizosh, nga cilësimet e Android (shih seksionin 2).
Sa kohë i mbajmë:
- Koordinatat që i dërgohen serverit: nuk ruhen; përdoren vetëm për përgjigjen. Kur je më larg se 50 km nga çdo qytet, ruhet vetëm vendbanimi që gjendet, me koordinata të rrumbullakuara në 0,1° dhe pa identifikues pajisjeje, si pjesë e listës së qyteteve dhe pa afat.
- Numëruesit ditorë për qytet: mbahen pa afat, sepse nuk përmbajnë të dhëna personale.
- Log-et teknike të serverit: mbahen për kohë të kufizuar dhe mbishkruhen automatikisht.
- Të dhënat në telefon: derisa t'i fshish ose ta çinstalosh aplikacionin; nëse kopja rezervë e Android është aktive, një kopje mund të mbetet në kopjen rezervë të llogarisë tënde Google.
- Email-et: sa kohë duhen për bisedën; mund të kërkosh t'i fshijmë më herët.
- Cloudflare, Google, Microsoft, OpenStreetMap Foundation dhe Quran.com i mbajnë të dhënat sipas politikave të tyre.
Disa nga këto shërbime (Cloudflare, Google, Microsoft) i përpunojnë të dhënat edhe jashtë Shqipërisë dhe BE-së, për shembull në SHBA, me masat mbrojtëse që parashikojnë kushtet e tyre për mbrojtjen e të dhënave. Kërkesat e aplikacionit për recitimet e Kuranit (lista e recituesve dhe skedarët audio) shkojnë direkt te Quran.com, në SHBA. Ne nuk shesim të dhëna dhe nuk ua japim të tjerëve, përveç shërbimeve të përmendura këtu.
5. Të drejtat e tua
Sipas GDPR dhe ligjit shqiptar për mbrojtjen e të dhënave personale, ke të drejtë të kërkosh qasje te të dhënat që kemi për ty, korrigjimin ose fshirjen e tyre dhe kufizimin e përpunimit, të kundërshtosh përpunimin që bazohet në interesin tonë të ligjshëm dhe të tërheqësh pëlqimin në çdo kohë.
Në praktikë: nuk kemi llogari, profil apo identifikues pajisjeje për ty, prandaj në serverin tonë nuk ekziston asnjë profil personal për t'u dorëzuar ose për t'u fshirë. Të dhënat e tua (qyteti, koordinatat, cilësimet) janë në telefonin tënd dhe i fshin vetë, duke fshirë të dhënat e aplikacionit ose duke e çinstaluar; nëse kopja rezervë e Android është aktive, një kopje mund të jetë edhe në kopjen rezervë të llogarisë tënde Google, që e menaxhon te cilësimet e kopjeve rezervë të Android. Nëse na ke shkruar me email, mund të kërkosh t'i shohësh ose t'i fshijmë ato email-e. Për të dhënat që përpunojnë Google, Cloudflare, Microsoft, OpenStreetMap Foundation ose Quran.com, mund t'u drejtohesh edhe atyre direkt.
Ke të drejtë edhe të ankohesh te autoriteti mbikëqyrës: në Shqipëri, Komisioneri për të Drejtën e Informimit dhe Mbrojtjen e të Dhënave Personale (idp.al), ose autoriteti i mbrojtjes së të dhënave në vendin ku jeton.
6. Fëmijët
Shërbimi është për publikun e gjerë dhe nuk u drejtohet posaçërisht fëmijëve. Meqë nuk ka llogari, nuk e kërkojmë moshën dhe nuk mbledhim me dije të dhëna personale nga fëmijët. Nëse je prind ose kujdestar dhe mendon se fëmija yt na ka dërguar të dhëna me email, na shkruaj dhe do t'i fshijmë.
7. Ndryshimet
Kur ndryshon mënyra si funksionon aplikacioni ose faqja, për shembull kur shtohet një shërbim i ri i jashtëm, e përditësojmë këtë faqe dhe datën „Përditësuar“ në krye. Kjo datë tregon versionin që vlen. Versionet e mëparshme t'i dërgojmë me kërkesë.
8. Kontakt
Për çdo pyetje për privatësinë ose për të ushtruar të drejtat e tua, shkruaj në [email protected]. Kontakti bëhet vetëm me email. Përgjigjemi sa më shpejt, dhe gjithsesi brenda afatit prej një muaji që cakton GDPR.